اليوم خارج من الدار ماشي يعلم بربي بحالي وبالصدفة ثمة بنية باين من هيأتها تقرا في الكولاج تمشي قريبة مني ...وصلنا بحذا الكولاج نشوف من بعيد مجموعة تلامذة يجروا و غبرتهم متوقة وتسمع كان في أصوات ما فهمتهاش عياط ...ضحك...شعارات...؟؟؟؟ أول حاجة مشى في بالي مظاهرة ...
المهم كيف قربت المجموعة بانت لكلها بنات جايات في اتجاه صاحبتهم لتمشي قدامي وبديت نسمع كان في كلام المدح ...
وووه شوف مزينها...
محلاااااك...
آمتى عملتيه...؟؟؟
تره تره خليني نشوف بالباهي...؟
ابعدوا يا بنات خليني نشوف في راحتي ونمس ...بخلاف كلام اخر...
وقفت البينة البطلة وبحكم هي أطول منهم علت راسها ولفتت وجهها للسماء وقالتلهم بالله لبنات ابعدوا عليا وما تمسني حتى وحدة على خاطر مالبارح وهو يوجع فيا خشمي...
بصراحة بقيت مستغرب ونشوف في حاجة تلمع في خشمها ظهرت عاملة برسينغ أمس وجاية اليوم تقرا بيه في الكولاج وصاحباتها مندهشات فيه وفيها...
بصراحة ألف سؤال جاء على بالي وقتها...
شكون يعمل البرسينغ هذا؟؟؟ عند الطبيب ؟ عند مختص؟
زعمة بقداش الكلفة...؟
شكون عطاها الفلوس...؟
زعمة عائلتها في بالهم بيها ...؟
شني اضرارو على جسم الانسان ...؟
زعمة في القانون المدرسي ممنوع مثل هذي المظاهر وإلا عادي...؟
نورونا يا ناس يا عالم يا هو ...واذا نحن اصبحنا ديمودي وفات علينا الفوت قولولنا زادا...