هذا النضج الذي أرتديه لم تلبسني إياه الأيام كهدية، لقد نسجته من تجارب قاسية و أخرى كادت أن تكون الأخيرة، و هذا الهدوء الذي يعلو ملامحي قد سبقه اندفاع كلفني كثيرا و قبل أن أقف بثبات هكذا تأرجحت و سقطت مرات وعدت من حافة الهاوية. كل خيط في هذا الثوب قد دفعت ثمنه بعضًا مني.
و مازلت أحارب تارة و أرقص أخرى
_
قالك ثمة مرة واحد لقى لفعة فوقها حجرة غاضاتو حب يعاونها
نحّى الحجرة من فوقها كي كمل قالتلو راني حالفة ألي يساعدني نلسعو
قالها ألعني ابليس كيفاش أنا ساعدتك وانت تحبي تلسعيني قالتلو نلسعك نلسعك راني حالفة
قالها باهي نسألوا ثلاثة حيوانات نلقوهم في طريقنا اذا عطوك الحق ألسعيني
أيا مشوا لقوا بقرة في الثنية حكولها الحكاية قالتلهم الإنسان قد مانعطوه الحليب ينكر الخير وفي الأخير يذبحنا ألسعيه يستاهل
زادو مشوا لقوا بهيم سألوه قالهم الإنسان قد مانخدموا ونهزلوا حاجاتوا يقسى عليا ويضربني ألسعيه يستاهل
زادوا مشوا لقوا حبيبنا الذيب
حكولوا القصة قالهم أنا منصدقش حتى تعاودوا تمثلولي المشهد من أول وجديد
أيا تكسلت اللفعة وعاود الراجل حط عليها الحجرة قالوا هكة لقيتها
قالوا خليها كيما لقيتها باش تعرف قيمتها نكارة الخير
إن أكرمت اللئيم تمردا
المهم ،تحيا للذيب وين ما كان😄
والحديث قياس وهذا حال اغلب الناس تصله فلا يصلك، وتهديه فلا يقدرك، وتحسن إليه فيسئ، وتكرمه فيغدر، وإن من الغدر لصوراً وأشكالًا .
نفسيتك باش ترتاح أكثر وقتلي تقتنع إنو مش كل حاجة لازم تعطيها قيمة و مش كل موقف يستاهل انك تنفعل على خاطرو و تغشش روحك عليه..
راحتك النفسية تلقاها أكثر وقتلي توصل لمرحلة انك ماتحبش تعرف كل شيء و تتعلم تتعامل مع الأفعال مش مع النوايا و تستوعب إنو مش كل كلمة تستاهل ترجع عليها و لا كل حاجة لازم تتفاعل معاها بكلّك سواء بالباهي أو بالخايب..
تولّي تغزر أكثر ملي تتكلم و تختزل الاحداث و تعرف النتيجة منغير ما تدخل في حديث ينجم يتعبك..
تصبح تتجاهل باش تكسب راحتك وصحتك
