تونس كانت و مازالت و باش تقعد عقدة دول شمال افريقيا خاصة و اوروبا والغرب بصفة عامة خاطر يعرفو في قرارة أنفسهم إنو البلاد هاذي تاريخها كبير و حضاراتها عريقة. برشا دول تتمنى تشوف تونس " تندثر" خاطر مستحيل يكون عندهم تاريخ كيف تاريخنا و حضارات كيما حضاراتنا. فما برشا دول تتمنى يكون عندها عرصة من عرص الموقع الأثري بقرطاج، يتمناو تكون قرطاج جات عندهم باعتبارها اول جمهورية في التاريخ و أسست كأول دولة في العالم . فما دول تتمنى يكون عندها مسرح واحد من مسارحنا اللي لتوا مازالنا محافظين عليهم كيما: مسرح قرطاج طبعا و دڨة و سبيطلة و أوذنة ( amphithéâtre) و المسرح القرطاجي بالجم اللي تنجمو تقولو مازال تقريبا كامل و فيه 3 طوابق و هو ثالث مسرح في العالم ( amphithéâtre)... فما دول تحلم يكونو عندها مواقع أثرية كيما Maktaris و Thuburbo Majus و Sufeitula و Bulla Regia و Thuga و غيرهم. فما دول تحلم يكونو عندها لوحات فسيفساء كيما اللي عندنا و اللي أغلبهم معروضين في المتحف الوطني بباردو. ثما دول تحلم يكون عندها كيف متحف باردو اللي justement فيه أكبر collection متاع لوحات فسيفساء رومانية في العالم. روما بيدها ما خلاوش فيها الرومان فسيفساء كيما اللي خلاوهم عندنا في تونس بعد ما قعدو 6 قرون كاملة. فما دول تتمنى تكون عندها في متاحفها أشهر لوحة فسيفساء في العالم اللي معروضة في المتحف الوطني بباردو و القاعة تحمل اسم اللوحة : Salle de Virgile و هي تمثل الشاعر Virgile مرفوق بملهمتيه Melpomène و Clio و هو قاعد يكتب في البيت التاسع من ديوانه الشعري L'énéïde على ورق البردي ( papyrus) فوق ركبتو و لوحة الفسيفساء هاذي كاملة و ما ناقصتها حتى قطعة من الحجر اللي يعملو بيه لوحات الفسيفساء. فما دول تتمنى تكون عندها زليزة ( قطعة جليز) وحدة من الزليز والبلاط والسيراميك اللي مزين قصور تونس و المنازل اللي يعود تاريخها لعدة قرون. فما دول تتمنى تكون عندها قبة وحدة من قبب قصور تونس اللي مزينة بنقش حديدة ( نحت على الجبس) و مزينتها الٱيات القرٱنية و إلا أشكال هندسية و إلا أنواع من الأزهار.
فما دول تتمنى يكونو الجيوش اللي خرجت من القيروان باش تفتح الأندلس تكون خرجت منها و موش من افريقية اللي عطات اسمها للقارة كاملة و لات اسمها افريقيا اللي هو اسم تونس الحالية في القرون الوسطى. فما دول تتمنى جامع عقبة يكون عندها. فما دول تتمنى القرٱن الأزرق النسخة الوحيدة في العالم تكون في متاحفها و موش في متحف رقادة في القيروان. فما دول تكون أروى القيروانية زوجة الخليفة أبي جعفر المنصور اللي شرطت عليه ما يتزوج عليها حتى مرا أخرى و كتبو شرطها في صداقها هذاكا علاش ولى يتسمى الصداق القيرواني، تتمنى تكون بنتها. فما دول تتمنى راضية الحداد و زبيدة بشير و بشيرة بن مراد و فاطمة الفهرية يكونو بناتهم و موش بنات تونس. فما دول تتمنى يكونو عندها 1300 كم من السواحل المتكونة من شواطئ رملية و صخرية و فيها خيرات ربي السبعة من حوت بأنواعو و شعاب مرجانية و نشاف و طحالب بحرية... فما دول تتمنى يكون عندها الثلاثة أنواع متاع الواحات كيما عندنا ( واحات جبلية كيما تمغزة و ميداس، واحات صحراوية كيما دوز و ڨبلي، واحات بحرية كيما جرجيس و ڨابس). فما دول تتمنى يكون عندها باب زويلة أو السقيفة الكحلة في المهدية. فما دول تتمنى يكون عندها رباط واحد كيما رباط سوسة و المنستير و كيما حصن الكراكة في حلق الوادي و برج غازي مصطفى في جربة. فما دول تتمنى يكون عندها جامع كيما جامع الزيتونة المعمور الي هو اول جامع افريقيا و عربيا وفي العالم . فما دول تتمنى يكون عندها شباك واحد من شبابك سيدي بوسعيد. فما دول تتمنى يكون عندها أزياء تقليدية كيما لبسة الحمامات و رفراف و رأس الجبل و طريزة نابل و المليك القروي و لبسة المهدية و حمام سوسة و مساكن و صفاقس حولي بوزيڨة الڨابسي و لبسة جرجيس و تطاوين و بن ڨردان و مدنين و المرساوي و الكبوس الغارق و الفوطة و البلوزة و السفساري حرير تونس و العجار و البخنوڨ... فما دول تتمنى يكون الكسكسي التونسي و البريك و صوابع فاطمة و مرقة القسطل و المرقة الحلوة و السلاطة المشوية و اللبلابي و الكفتاجي و الصحن التونسي و اللاڨمي و دڨلة نور و البسيسة بأنواعها و زيت الزيتون بأنواعو و الهريسة و كعك الورقة بالنسري متاع زغوان و كعك التمر متاع قليبية و مقروض القيروان و الهريسة الحلوة و المعاصم و المدموجة و المحكوكة و وذنين القاضي و البريكة الحلوة و كعابر اللوز و الطواجن و البجاوية و الجلجلانية و اللكلوكة الصفاقسية و عصيدة الزڨوڨو و البوفريوة و الفطاير و الفريكاسي و البمبلوني و الشرمولة بأنواعها الصفاقسية و الجربية و الجرجيسية و رمان ڨابس و تستور و لوز صفاقس و جرجيس و تفاح سبيبة و غيرو و غيرو يكونو متاعها...
فما دول تتمنى يكون عندها باب واحد من بيبان مدينة تونس و ما أدراك كيما باب سعدون و باب جديد و باب الفلة و باب سويقة و باب الخضراء و باب منارة. فما دول تتمنى عندها ولي صالح واحد من الأولياء الصالحين اللي أضرحتهم مازالت في أغلب مناطق تونس كيما سيدي محرز سلطان المدينة ( مدينة تونس) و سيدي بن عروس و سيدي البشر و سيدي بوسعيد الباجي و سيدي بوعلي و سيدي الصحبي و سيدي بولبابة و السيدة المنوبية و أم الزين الجمالية....
فما دول عندها رقعة ترابية بمئات الٱلاف بل ملايين كم مربع و ما فيهاش حاجة مالحاجات هاذم اللي سميتهم في النص هذا و ملي ما سميتهمش خاطر تاريخ تونس و حضاراتها متاع أكثر من 9 قرون قبل ميلاد المسيح و القرون الكل بعد ميلاد المسيح ما نجمش نكتبو في نص واحد.....
تونس ما يعرف قيمتها كان اللي يعرف تاريخها مليح و نفتخر و بكل تواضع إني وحدة ملي يعرفو تاريخ تونس مليح مليح و باش نبقى نقرا عليه أكثر