السؤال هذا مهم جدا كيف ماذكرت قبل! الهدف منه مش أعطينا بركة نقولوا الّي القرطاجيين هوما الي بناو الحنايا و نحاولوا بالسيف ننسبولهم إنجازات خاطيتهم! لا، السؤال أعمق بكثير، يخلينا نراجعوا تاريخنا و أعمال المؤرخين، مش القدماء فقط، بل أيضا المعاصرين. تعرفوا شمعناها كان بلحق الحنايا هي إنجاز قرطاجي و تم نسبه للرومان؟ معناها قاعدين نحققوا في أهداف أعضاء مجلس الشيوخ الروماني و أولهم كاتو الأكبر، إلي أكد على ضرورة تدمير قرطاج و إبادة شعبها، قولته الشهيرة:
Carthago Delenda Est
و بعد حكاولنا مؤرخيهم كيفاش تدمرت قرطاج بالكامل و أحرقت منشآتها، و انت تقرى تحس فما مبالغة في الوصف و فخر و إعتزاز من قبل هالمؤرخين...عندهم الحق، بلادهم شكون يسالهم...لكن، هل حقا دُمرت قرطاج بالكامل؟ روما المعرفة بذكاء سياستها الإستعمارية و غايتها الكبيرة في التوسع في حوض البحر الأبيض المتوسط، هل باش يساعدها تدمير كل المنشآت إلّي مؤرخين كيف "بوليبيوس" إلي جاء لقرطاج أبدى إعجابه بالمعمار القرطاجي ووصفه بالعظيم. هل كلو تم تدميره؟ أو تم إعادة تهيأة ماتم تدميره لتلبّي حاجة الرومان! هنا سيدي خويا فما فرق ... بين "بَنًى" و "رَمَّم" أو "أعاد تهيئة" فما سنوات ضوئية، و ديما يُنسب البناء لمن بناه و مش لمن رممه!
طولت عليكم أصدقائي و مازال عندي منقول! هذه مجرد محاولة لقراءة السرد التاريخي من منظور آخر و تحليله بالإعتماد على المصادر (في أول تعليق)، و رغم الي مازالو أمثلة أخرى تتعارض مع فكرة أن روما هي أول من شيد قنوات المياه، كيف تعرف الي ماغون القرطاجي أب الفلاحة الي ساهم في ازدهار الفلاحة في قرطاج منذ القرن الخامس ق.م. و تنجم تفهم من أعماله الي فما أنظمة متع جلب المياه العذبة من أماكن بعيدة و أنظمة ري و إلخ...من القرن الخامس ق.م. يابوقْلب!!!، و كيف تعرف زادة الي معبد المياه "الروماني" في زغوان مثماش كيفو في روما أو مستعمراتها، و كيف تعرف الي في القرون الرابعة و الخامسة و السادسة عشر، فما إجماع من المؤرخين و صناع الخرائط إلي الحنايا هي قرطاجية أمثال:
Giacomo Gastaldi and Abraham Ortelius...
في النهاية، أحنا لكلنا يهمنا مصلحة بلادنا تونس الغالية، و صدقوني من أهم مصالحها، ننصفوا تاريخها و نورّيو فخرنا بيها أمام العالم، على هذا أنا مُصر نستخدم اللغة الأنقليزية و نحاول نوصّل رأيي في السرد التاريخي معتمد على أعمال مؤرخين عاشوا في فترات مختلفة ...و نحب النقاش و التساؤلات من قبل الأصدقاء المتابعين، لأنني كان نحكيلكم قداش تعلمت منهم ...
شكرا لكل من وسع باله ووصل للنقطة هذه من المنشور و ربي يحمي بلادنا تونس 🇹🇳❤️